رقیه کبیری -یئردن اوجا تورپاق- ترکی رمان
رقیه کبیری
یئردن اوجا توپراق
80،000 ریال
ترکی
978-600-94300-4-8
رقیه کبیری -یئردن اوجا تورپاق- ترکی رمان
راوی یازی میزینین آرخـاسیندا اَیلشدی. خیـاللاری بیر- بیرینه ایلیشیب، ذهنینده گـؤزله نیلمز طوفـان قوپور. قصدی یوخدور ناغیل دئییب، افسانه توخـوسون. بو دؤنه یئرله گؤیو بیر- بیرینه تیکمک ایستهییر.
میزین اوزرینه دیرسکلهنیب، اوزونو اوووجلاریندا گیزلهدیر. نشان بارماقـلاریلا آلنینی سیخیر. آنجاق طوفان ساکین لشمیر. اوتـوراجاغین دایـاناغینـا دایانیـر. بارماقـلارینی آستـا- آستـا گیجگاهلارینا آپاریپ، گؤزلرینی یومور . دایرهوی حرکتله گیجگاهـلارینی اؤوکلهییر. زامان کیپریـک لرینین آلتینـدا دالغـالانیر. گاهـدان میلاد دان اوّلکی ایـل لـره دوغـرو آخیـر. گاهدانسا دا یئردن اوجا، قیرمیزی تورپاغا ساری قالخیر. اوزون زاماندان سونرا طوفان آرا کسیر. ذهنی دینجهلیر. ایستهدییی سـؤزلر سایخاش- سایخاش فیکرینه یاغیر. گـؤزلرینی آچیر. کاراکتئرلریندن ایذنسیز، اونلارین دوشونجه لرینی سورو-شمادان بئله، بارماقـلاری لپتاپین کلاویهلـرینین اوزرینده اوسطورهیله علمدن دوغولموش، بیر خیال رقصی باشلاییر.
- گیل نه آنلاما گلیر؟
بو سوالی یئنیدن سوروشاندا، اؤز سسیوه یوخودان آییلدین، گـؤزلریوی آچدیـن. ظولمتدن باشقا هئچ نه گـؤرمـهدیـن. منجّیم دئمیشدی: - یولا چیخماغا یاخشی سوالدی.
سونرا آستاجا، یاستی- یاستی سؤزونه دوام ائتمیشدی او:
- گیل، مرّیخده بیر دره نین آدیدی، کـیوراسیتـی بـانو او درهیه ائنیبمیش. گـؤزلرین سایخاش- سایخاش اوتاغین قارا-
نلیغینا اؤیرهشیر. دیوارا دایانمیش یازی میزی اَسکی بیر صاندیق کیمی گـؤزه گلیر. لپ تاپین صاندیغین اوزرینـه بوراخیلیب. مطالعه چـراغـی سـول بوجاقدان کتابا ساری اَییلیب. اوشـاقلیق چاغـلاریندان اونودولموش مداد قابین، مداد - خـودکـارلا دولو، تایسیز ساخسی باشماق، بیر بوجاقدا دورور. نئچه قالین کتاب صانـدیغین ساغ یؤنونده بیر - بیری نین اوستونه قالا نیب. بو کتابـلارین هر بیری سؤز خزینه سی دیر. هـردن بیر الیوی اوزالدیب، ایستهدییین سؤزو اونلاردان سئچیب، چیخاریر- سان. دیوارا یاپیشدیردیغیـن کاغیذلار، پیر آغاجینا دویونلنمیش قومـاشلار تک، یئللنمهدن آسیلـی قالیبلار. اوزاندیغین یاتاقدان، پنجرهنین اؤنوندهکـی تـور پردهنی بئله سئچه بیلیرسن. یـوخـو بـاشیندان اوچموش گـئجهلر کیمی، عـادت اوزره قـالخیب، پنجرهنین اؤنونده دایانیرسان. پردهنی اووجوندا سیخاراق، حیطین ظـولمتینه دالیرسان. حیطین چئورهسیندهکـی بینالارا طرف بویـلا نیب ایشیغی آچیق پنجرهلـردن، بـاغلی کرکره لردن، اؤز ائکیزیوی آختاریب یوخلاماق ایستهییرسن. نه بیلیرسن، بلکه ائله ائکیزین ده باشقـا بیر جغـرافیادا سینیق- سالخـاق بیر بینانین اوچونجو مـرتبهسینده، پنجـره اؤنونده دایانیب، پردهنی چنگلهیهرک، ظولمته گؤز تیکیبمیش!
یئریندن قالخمیرسان. اوتاغا گؤز گزدیریرسن. منجیمدن هئچ خبر- اَتـر یـوخدور. راوی آرخـاسینی سنه دؤنـدهریب، یازی میزینین دالیندا ایلهشیبدی. یاتاغیوین ایچینده اوزو قویلو دؤنـوب، باشیوی بـالیشیوا سیخیرسان. بیلمیرسن باشین آغیرلاشیب، یوخسا بالیشین داشا دؤنوب. کیلکهلنمیش قیوریم ساچـلارین بوینووون دالیسینی قیزدیریر. یئرینده ترپهنیرسن. تنبل جانین عاغلیندان فرمـان آلمیر. یئنیدن دؤنورسن. آرخان اوسته اوزانیب، گـؤزووو اوتاغیوین تاغینا تیکیرسن. گـیل درهسینی چئورهلهمیش داغلار تاغدان آسیلی قالیب. داغلارین اورتاسیندا اوزون- اوزادی دره، چوخ دا درین نظره گلمیر. گـؤز گزدیر یرسن. ناسانین مریخه گـؤندردییی آراشدیریجی ماشین گـؤزووه دَیمیر. یقین کی، بو ماشین باشقا ماشینلاردان فرقلیدیر،- دئیه، دوشونورسن. تـاغدان آسیلی داغ- درهیه زیللهنرکن، دواغین قاچیر. - هله نه یاخشی کی منجیم دئمهدی ملکه کیوراسیتی!
خیتـالیویـن ال ائویندهکـی ملکهستی فیکرینده جانـلانیر. اینگیلترهنین قاریمیش ملکهسی، فیروزهای رنگده دوروشو-
قلو بیر دوپییئس گئیمیش، دوشوک چیینلریله اؤنونده دایانیر. هله ده اوزانـاقلی قـالیب، یئریندن قـالخمیرسان. ملـکهنین بوزوشموش دریسی بـارماغینداکـی فیروزه قـاشلی اوزویو دیقّتیوی چکیر. فیروزه خوشلادیغین داشلارداندی. قاریمیش ملکهلری سئوه بیلمیرسن. جذبهسیزدیلر. یاسمن عطری یئرینه، کافـور قوخویورلار. اوشاق واختی ائشیتدییین ناغیللارداکی ملکه لرین جذبه لرینه دالیرسان. الماس داش- قاشلی چلنگله بـزنمیش قاپقارا تئللر، ایشیم- ایشیم پـاریلدایان ببکلـر، طراوتلی دوداقلارین بوجاغیندا عشوه لی بیر گولوش، آرخا - لیغیندا میرواری دان تیکیلمیش بوتالار، اَتهیی یئری سوپوروب کـئچن ملکه، فیـکرینده جانلا نیر. ناغیللارین ملـکه سینـی دوشوندوکده، فیکرین بئله یاسمن عطری قوخویور.
اینگیلتره ملکهسینین هئچ عاغلینا دا سیغماز کی، گئجهنین یاری چاغی، دونیانین اوزاق بیر بوجاغیندا، تبریز آدلی شهر-
ده، گلیب بیر قـادینین دالغین خیالینا گیرسین.
کیوراسیتی بانونون سیر- صیفتینی دوشوندوکده، اونا عایید هئچ بیر شکیل فیکرنده جانلانمیر. آمما یقین بیلیرسن کی، باشینا چلنگ تاخیب، یاسمن قوخویان بیر ملکه کیمی اولا بیلمز. ناسا موهندیسلری اؤز یارادیجیلیقلاریندا نه قدر اینجه و درین دوشونجهلـره مالک اولسالار دا، آنجاق اونو یـالنیز بیرکارمند قادین فیقوروندا یارادا بیلرلر. بلکه ده ائله اونو ال- قولو قوّتلی بیر ایشچی کیمی یـاراتمیشلار. علم اوچون اؤنملی اولان کیوراسیتی بانونو گؤرمه میشدن، خیالیندا اوندان هئچ بیر اوبراز یارادا بیلمیرسن.
بارماقلاریوی بوینووون آرخاسیندا بیر- بیرینه دویونلهییر-سن. گیل درهستی هله ده چئورهسیندهکی داغ - تپهلریله تاغدان آسیلی قالیب. داشا دؤنموش بالیشین یومشالیب، داها بوینوون مؤهرهلرینی اینجیتمیر. گؤزلریوی یومورسان. تسبئح دنهسینه دؤنموش بیر کلمه، گـئجه وردی کیمی، مقدس سس تـونیـلا حولقوموندا سسلهنیر: «گیل… گیل… گیل…»، بیردن - بیره خیالین قیغلیجیملا نیر. تسبئح دنه لری بیر- بیرینین آردیجا دوزولور، سؤز دیلینده بوتونلهشیر: « گیلگمیش».
راوی اوتوردوغو یئردن دؤنوب، سئوینجک سنه باخیر. قفیلدن یـازی میزینین آرخـاسیندان قـالخیب، کـتاب رفینه دوغرو قاچیر. کتابلارین ایچیندن بیریسینی گؤتوروب، ذؤوق ایله اونو واراقلاییر.
قیفیللانمیش دوداقـلارین بیر- بیریندن آچیلیر: آااااای…
او آندا پازئلیوین ایتمیش قیطعهسینی تاپمیش بیر قیزجیغازا اوخشاییرسان. ایچینده هیجان کئچهرک قالخیب، یاتاغیندا اوتورورسان. گیل درهسی یوخا چیخیب، دئیه- اونون یئرینه-
اسـکی و آنتیک بیر شهرله آلا قـارانلیق بیر اورمان اوتاغیوین تاغیندان گؤیهریر. بالیشی باغریوا باسیرسان. سویوق بالیش-
سندن بئزمیش سئوگـیلیوه اوخشاسا دا، آنجـاق داش دئییل،
یومشاقدی. اللریوی ساچلاریندا گزدیریرسن. پیرتلاشدیر-
یـرسان. هیجانـدان یاناقـلارین پؤرتور. کـؤهنه، بوزارمیش گـئجهلییوه فیکیر وئـرمهدن، اؤزووو بیـر ملـکه کیمی حیسّ ائدیرسن؛ کـلمهلرین ملـکهسی. ایندی کـلمهلـرین گوجونه گـووهنیب، ساواشا دا بیلرسن، باریشا دا بیلرسن. اؤلـدوره ده بیلـرسن، دیریلده ده بیلرسن. اوستهلیـک، کـؤهنه کـاغیذ قوخویان اوتاغیوی یاسمن عطریله دولدورا دا بیلرسن. حتّا بیر بوداق یاسمن بئله اوتاغیوین بیر کونجونده اَکه ده بیلرسن.
راوی اوتاغیوین قاپیسینی اینگیلترهنین ملکهسینه گؤستر-یر. قاپی آچیلیب، باغلا نیر. اوتاغین هله ده کافور قوخویور. راوی ذؤوق ایله کتابی واراقـلاییب، دیل- دوداغی آلتیندا میزیلدانیر. سنه باخیب، سسینی اوجالدیر. گئجهنین بو واختی شعر اوخوماق هوسی باشینا ووروب. گؤزل بیر سسی اولما-سا دا، خیریلتیلی، یورغون سسیله شعر اوخوماغا باشلاییر.
- « قوپمامیش طوفانلارین ساواشچیسی، گـاهدان داریخقا - نلیغـا، گاهدانسا دا اومیده سیغینارمیش، آغـری- آجیلارین داشلار اوزرینه قازارمیش…»
کتابی لپتاپین یاخینلیغینا قویوب، یازیر. گؤزل و قولاغا اوخشایـان بیـر کیشی سسی کـلاویـهلـرین تیققاتیـق سسینه قاریشیر…
- «آنا، کئچن گئجه یوخومدا اؤزومو گؤروردوم. گؤردوم اَرلرین اورتالیغیندا گئدیرم. اولدوزلار گؤیده سایریشیردیلار. پارلاق بیر اولدوز داشی گلیب اوزریمه دوشدو. چالیشیردیم اونو قیراغا چکیم. بیر قادین اؤنونده اَییلدیییم کیمی، اونون اؤنونده اَییلمیشدیم. اونو یئردن قـالدیریب، سنین اؤنونده دیز چؤکدوردوم. سنسه اونو منه بیر تای- توش، بیر آرخاداش کیمی بیلدیردین».
کیشینین سسیندن داها دا آرتیق، قولاق اوخشایان سئحیرلی بیر قـادین سسی قـالخدی. سس قـالخدیغیندا عود قوخوسو اوتاغیوی بورودو. عودون شیرین قوخوسو، خوشلامادیغین بیر قوخو؛ هله قالسین کی اینگیلتره ملکهسینین کافور قوخوسو دا اونا قاریشسین. بوننان بئله سئحیرلی سسین جاذبه سی خوشلا
- مادیغین قوخولارا غالب گلدی.
- «گؤیدن سنه دوغرو گلمیش اولدوز داشینی، چالیشیب یئردن قـالدیریب، بیر قـادین اؤنونده اَییلدییین کیمی اونـا اَییلیب، منیم اؤنومده دیـز چؤکدوردویون، سنه عؤمور بویو یولـداش و آرخاداش اولاجاق. او، چوخ یاخین بیر گلهجکده سنه دوغرو گلهجک.»
کتاب کاراکـتئرلری اوتاغیوا گئت- گل ائتدیکده ندنسه سنده هئـچ ده حئیرت دوغـورمور. ائله بیل ایـللر اوزونـو اونلارین گلیشینی گؤزلهییرمیشسن.
گیلگمیش، اوروک شهری نین پادشاهی، دیکباش بیر اوشاق کیمی، یاشا دولموش آناسینین اؤنونده دیزه چؤکوب. آناسی، نیـن سان تانریچاسینین مقامی، اینگیلتره ملکهسینین مقامیندان داها دا یوکسکدی. ایللرین سیناقلاری گوموشو تئللره چئوریلیب، خورمایی ساچـلارین بزهییب. چوخ گؤزل اولماسا دا، آنجـاق اوز- گـؤزوندن ووقـار یاغیر. باخیشلاری غرور دالغاسیدیر. گاهدان عاغیل، گاهدانسا دا قـایغی اؤزونو بو دالغانین ایچینه آتیر. هر دؤنه اونا باخیب سسینـی ائشیتدیینده ایچینده آلقیش دوغولـور. گیلگمیش قفیلدن آیاغا قـالخیر. گـؤرکمی اوجـا بویلو و یـاراشیقلیدیـر. دریدن تیکیلمیش آرخـالیغی، باشینداکی بوینوزلو باشلیغی، اونون دیک بـاش اولدوغونو داها دا آرتیق اوزه چکیر. چئوره سینه ائله باخیر کی، گومان ائدیرسن شاهلیق تختی و تیکدیردییی بؤیوک- کیچیک معبدلردن باشقا هئچ کیمی، هئچ یئری گؤرمور. گیلگمیشین هئیکلیندن یاغیش دَیمیش ساخسی نین ایییسی گلیر. داها عودنان کافور قاریشیم بیر قوخونو حیسّ ائتمیرسن. ائشیتدیکلرینه گؤره گیلگمشین ووجودونون اوچ حیصّهسیندن ایکیسی تانریسَل، بیر حیصّهسی ایسه، انسانسَلدی. آیاقدان- باشا اونو گؤزدن کئچیرتدیکده، سادهجه اونون انسان سل لیینی گؤره بیلیرسن. اونـون وجودونـدا تـانریلیق نیشانـلارین آختاریرسان. راوی آنجاق اونون گوج سیموولونو، بوینوزلو باشلیغینی گؤستهریر. سنین دوشونجهوه گـؤره بوینوزلو باشلیق تانریسللیک ساییلا بیلمز. بیر داها اونون گوجلو اوموزلارینا، صیفتینی داها غورورلو گؤسترن ساققالینا، دوروشوقلو هئیکلینه گـؤز گـزدیریرسن. گؤزون یئنیدن بوینوزلو باشلیغا ساتاشدیقدا «یوخ، اولا بیلمز!» دئییرسن. سؤز سوز- صؤحبت سیز، راوی-
نین خیال گوجوندن ، اوتاغیندا گؤیرمیش بو هئیکلین انسانی بیر بوتؤولویو وار. اونون تـانریسل حیصهسینی نئجه گـؤرمک اولار، دئیه- شاشقین قالیرسان. بیر نئچه ثانیهلیک گیلگمیشین گـؤزلرینه گیریرسن. اورادان، اونون گؤزوندن اؤزووه، هم ده راوییه باخیرسان. گیلگمیش یالنیز سنی دئییل، راوینی بئله گؤره بیلمیر.
راوی کـتابی واراقـلادیقجـا سن دوشونـجهیـه دالیـرسان. گـیل گمیشین اوچـدن ایکی حیصهسی تـانریسل اولـورسا بئله، بئشمین ایل میلاددان سونرانی گؤرمک گوج و عاغیلا مالیک دئییل، لاکین سنده، اییرمی بیرینجی عصرین انسانیندا، عصرلر گئرییـه دؤنمک گوج و قابلیّتی وار. تاریخین بوتون صحیفهلـرینی واراقـلاماغا گـوجون یئترلـی اولمـاسـا بئلـه، ایستهدییین عصره کتابلاردان بیر دئشیک آچیب، او عصرین هـانسیسا بیر بوجاغینا گـؤز گـزدیریب، آراییب آختـارد-
یقلاریوی تاپا بیلیرسن. لاپ ائله بو آن قالخیب، قونشو سیّاره، مریخه، سفر ائده بیلرسن. کیوراسیتی بانویلا تایلاشیب، گیل درهسینی قاریش به قاریش گَزیب دولاشا بیلرسن .
بوزارمیش گئجهلییینله، پیرتلاشیق ساچلارینلا، اؤزووو مینلر ایل میلاددان اؤنجهیه سفر ائده بیلن بیر گوجلو ملکه سانیرسان.
گئجهنین قـارانلیغیندا توخودوغون خیاللاریوا گـولمهیین گلیر. نئجه ده وسوسهلیدیر سؤز مولکونون ملکهسی اولوب خیال آتینی چاپدیراسان!
راوی، قـابا سسیله دیل- دوداغی آلتیندا میزیلدانیر. بو دؤنه شعر اوخوماق یئرینه تـانیش بیر آدی زومزومه ائدیر: «ایشتار قد یسه سی… ایشتـار قدیسه سی… ایشتـار قدیسه سی…»، سنسه راوی میزیلدادیغی سس تونلارینی خوشلاییرسان. اونونلا برابر، سن ده میزیلدانیرسان: « فا… سُل… لا… دو… رِ… می… ، ایش…تار… قد…دی… سه… سی… فا… سُل… لا… دو… رِ… می… »
نوتلاری تـکرار ائلهدیـکجه، دئیهسن میـلاد دان اؤنجه، اسکی بیر معبد ایچره مقدّس موسیقی تونونو زومزومه ائدیرسن. راوی کتابی ائله ذؤوق ایله واراقلاییر کی، اونا قیسقانیرسان. راوییه گؤره ایشتار قیمتلی بیر آددیر. بو آد، یالنیز تانریچا مقامینا گؤره دئییل، حتّا تانری و تانریچالارین یولوندا جانیندان اسیرگـمهین شَمخَت آدلی بیر فـاحشه اولـورسا بئله، ایشتار قیمتلی آد ساییلیر. بینالنهرین تـانری و تـانریچالارینین بویوردوقلارینا گـؤره، شمخت اؤز یولونو طبیعتین اَن جانلی کیشیسینین یولونا کسمه کسیب، اونـا یئمک، ایچمک، گئیمک اؤیرهدیب، اوستهلیک، اونون ذاتی ایستکلرینین اودونو سؤندوروب، اونو اؤزویله سومئر مدنیّتینین گـؤبهیی ساییلان اوروک شهرینه گتیرمکله، آغیر بیر مأموریتی باشا چاتدیریبمیش.
راوی کتابی واراقلایاراق دئییر: «یئددی گتئجه - گـوندوز اؤتوشندن سونرا، شمختین سایه سینده انکیدو آدلا نان طبیعتین وحشـی کیشیسینین ماهیّتی، خولق- خویو چؤنوب، قـوزو بالاسی تک حمیلله شیر»
سنسه دیلین دینج دورمور: «لاپ ائله اعمال شاقّهدی. بلکه اوندان دا بَتر… اووووه… یئددی گئجه- گوندوز… اووووف…. یئددی گئجه… عجب دؤزوملو قدّیسهیمیش!»
گئت- گئده، سنده انکیدونو گؤرمک هوسی آرتیر. آز قالیر راوی یه « انکیدونی منه گؤستر» دئیهسن. آمما نَسه اؤزووو سیندیرمیرسان. گؤزلمهلیسن. اورهیینده شمختی آلقیشلایاراق بیر داهـا میزیلدانیرسان: «یئددی گـئجه - گوندوز…. یوووووو». آبدال دوشونجهندن توکـلرین بیز- بیز دورور. اؤزووو داش کیمی، آرخـان اوسته یاتاغا بوراخیرسان. دؤشَهیین فنرلـری اینجیییب، اونون جیر- جیر سسی اوتاغین قارانلیغینی جیزیر.
کیپریـکلریندن داش ساللا نیر. منجیم سسسیزجه کیپر-یکلریوین میل - میل سینیرلارینی سیندیریب، گؤزووه سیزیر . ندنسه گیلگمیشله اونون آراسیندا بیر بنزرلیک آختاریرسان؛ گئییملری بئله، میلاددان اؤنجه یاشایان کیشی لرین گئییمینه اوخشامیر؛ هله قالسین کی، گیلگمیشین دیگر نیشانلارینی اونون سیر- صیفتینده آختاراسان. منجیم اوجـا بویلو اولسا دا، دوشوک چیین لریله، دوروشوقلو، توتقون رنـگلی پئنجک- شالـوار ایچینده، اورتـا بویلو نظـره گلیر. گـؤز آلتی اونـو سوزورسن. سیخ قاشلاری گؤزلرینی کؤلگهلهییبدی. آغزینی آچیب، دانیشدیغی آن، بیردن- بیره اونونلا گیلگمیشین اورتاق نؤقطهسی گؤزووه دَییر. ساققال یالنیز سومئر شاهـلاری نین دئییل، بوتـون بینالنهرین شاهلاری - نین گؤزللیک و گوج سیموولو ساییلیرمیش. منجیمین گـؤزو سنین اوزووه زیللهنرکن، دیل- دوداغی آلتدا بیـر سؤز دانیشیر. قولاغیوین پردهسی دیاپازون کیمی تیترهییر: