به زودی- نیسگیل لی دویغولار عباس بارزین شعرتوپلوسو


به زودی- نیسگیل لی دویغولار عباس بارزین شعرتوپلوسو

اؤن سؤز

وارليق اينينده و حيات ساحه­سينده، شعورون دوغولماسي،‌ اَن مهم حادثه سانيلديقدا اونون آغزيندا يارانان ديل قورولوشو، هر بير هنرين آناسي تانينيب و او عالمده­ ايلكين بير گؤرونگو کیمی تانينير. ائله‌ كي، ديل يارانيشي، درّاكه يارانيشي كيمي وارليق دونياسيندا اَن اوستون بير مقاما مالك‌دير؛ و ديل قورولوشو ايچينده، شور و شعورون تلقيحيندن دوغرولان حادثه‌يه شعر دئيه، شاعر طبعيني يارانيش اوجاغي و طبيعت‌له اجتماعني اونون خميره‌سي بيلمكله بير گؤرونگو كيمي اونا اينانيريق و گولوبالليق رتبه‌سيني‌ ده، اونون نئجه دئييلمه‌سيله بيرگه، نه دئمه‌سي‌نين سينيرسيزليغين‌دا گؤروروك…

عهد ائتميشَم خدا ايله بايرام توتام اؤزوم     آذر ائليم بو اؤلكـه‌ده دامــاد اولان گونـو

بـارز! او قــدر اؤلمه‌يه‌سن ­كي، گؤزون گؤره     ائل كورسوسونده، سن ده بير اوستاد اولان گونو

اوستاد بارزين بير چوخ آرزولارينا تاي، بو آرزوسو دا دوغرولماديق‌دا، اوتوز ايلدن سونرا يئنه‌

ده بير باشقا غزلده، بو ايسته‌يين دواميندا دئيير:

يئتميش ايلي توي توتماديیا ائل سنه، بارز     ائل​شاعري، عمرون يئته هشتاده گركدير​

يازيق‌لار اولسون كي شاعر، يئتميشي سَكسن و سَكسني دوخسانا دا يئتيرير، آنجاق كورسوسوز ائلي‌نين كور دورومو اثرينده، اوركده بسله‌ديیي جانلي ايستك​لري، اؤزو ايله تورپاغا تاپشيريلير…

نه ياخشي كي، عمرونون سون چاغيندا، قلميندن سوزولن ياسلي ديلك‌لر سؤزونون بير پارچاسي «ياسلي ساوالان» آدلي بير كتابدا گون اوزو گؤره بيلدي… و باشقا نيسگيللي سؤزلري بو گونه‌دك اؤرپك‌لر آلتيندا، دوداق‌لاري كيمي مهر-موم اولوب، قوولوق‌سوز يادلاردا، سس‌سيز، نفس‌سيز ايچيني چالماقدادير…

بؤيوك شاعريميزين بو سؤزو كي، «انسان دئديیين، اَتدن ديواردي، اَتدن ديوار اوستونده​ ده حساب ائتمك اولماز»، هر بير زمان بير تاپشيريق كيمي قولاق‌لاريمدا سسله‌نيب؛ حضور ساحه‌سينده، قورج آياق چاليشماغیما خبردارليق ائديب، ياريدا قويدوغوم ايش‌لريمي بويا-باشا يئتيرمه‌کده اراده‌لي ائديردي كي، بير قيسمي بارز معلّمين ياييلمايان اثرلري‌نين بير يئره توپلاييب، ترتيبلنمه‌سينه باعث اولدو و بو قرارا گلديم كي، بو توپلومو شاعرين طبعي ايله موافق و ايستك‌لري ايله اويغون اولان شعرلري اساسيندا «نيسگيللي دويغولار» ‌آدلانديريم.

و بئله‌جه ائل شاعريميزين اؤز ال‌لري ايله منه وئريلن شعرلري، بو ايكي كتابدا شعر سئور ائليميزه سونولدو. اولسون كي، ادبيّاتيميزلا علاقه‌لي فکیرداشلاريميز، اونون ياراتديغي اثرلري، اولدوغو كيمي آچيقلاماق‌لا بؤيوك شاعريميزين يانديرديغي چیراق­لارا ياغ اولماق‌لا گله‌جك يول‌لاريميزا ايشيق پايلاسين‌لار.